بالرغم منا قد نضيع...فاروق جويدة

(1)

قد قال لي يوماً أبي

إن جئت يا ولدي المدينة كالغريب

وغدوت تلعق من ثراها البؤس

في الليل الكئيب

قد تشتهي فيها الصديق أو الحبيب

إن صرت يا ولدي غريباً في الزحام

أو صارت الدنيا امتهاناً .. في امتهان

أو جئت تطلب عزة الإنسان في دنيا الهوان

إن ضاقت الدنيا عليك

فخذ همومك في يديك

واذهب إلى قبر الحسين وهناك صلي ركعتين

(2)

كانت حياتي مثل كل العاشقين

والعمر أشواق يداعبها الحنين

كانت هموم أبي تذوب .. بركعتين

كل الذي يبغيه في الدنيا صلاة في الحسين

أو دعوة لله أن يرضى عليه

لكي يرى .. جد الحسين

قد كنت مثل أبي أصلي في المساء

وأظلُ أقرأ في كتاب الله ألتمس الرجاء

أو أقرأ الكتب القديمة

أشواق ليلى أو رياضَ .. أبي العلاء

(3)

وأتيتُ يوماً للمدينة كالغريب

ورنينُ صوت أبي يهز مسامعي

وسط الضباب وفي الزحامِ

يهزني في مضجعي

ومدينتي الحيرى ضبابٌ في ضباب

أحشاؤها حُبلى بطفلٍ

غير معروف الهوية

أحزانها كرمادِ أنثى

ربما كانت ضحية

أنفاسُها كالقيدِ يعصف بالسجين

طرقاتُها .. سوداء كالليل الحزين

أشجارها صفراء والدم في شوارعها .. يسيل

كم من دماء الناس

ينـزف دون جرح .. أو طبيب

لا شيء فيك مدينتي غير الزحام

أحياؤنا .. سكنوا المقابر

قبلَ أن يأتي الرحيل

هربوا إلى الموتى أرادوا الصمت .. في دنيا الكلام

ما أثقل الدنيا ...
وكل الناس تحيا .. بالكلام

(4)

وهناك في درب المدينةِ ضاع مني .. كل شيء

أضواؤها .. الصفراء كالشبح .. المخيف

جثث من الأحياء نامت فوق أشلاء .. الرصيف

ماتوا يريدون الرغيف

شيخٌ ( عجوز ) يختفي خلف الضباب

ويدغدغ المسكينُ شيئاً .. من كلام

قد كان لي مجدٌ وأيامٌ .. عظام

قد كان لي عقل يفجر

في صخور الأرض أنهار الضياء

لم يبق في الدنيا حياء

قد قلتُ ما عندي فقالوا أنني

المجنونُ .. بين العقلاء

قالوا بأني قد عصيتُ الأنبياء

(5)

دربُ المدينة صارخُ الألوانِ

فهنا يمين .. أو يسارٌ قاني

والكل يجلس فوق جسمِ جريمةٍ

هي نزعة الأخلاقِ .. في الإنسانِ

أبتاه .. أيامي هنا تمضي

مع الحزن العميق

وأعيشُ وحدي ..

قد فقدتُ القلبَ والنبضَ .. الرقيق

دربُ المدينة يا أبي دربٌ عتيق

تتربع الأحزانُ في أرجائه

ويموت فيه الحب .. والأمل الغريق

(6)

ماذا ستفعل يا أبي

إن جئتَ يوماً دربنا

أترى ستحيا مثلنا ؟؟

ستموت يا أبتاه حزناً .. بيننا

وستسمع الأصواتَ تصرخُ .. يا أبي : يا ليتنا ..يا ليتنا .. يا ليتنا

وغدوتُ بين الدربِ ألتمسُ الهروب

أين المفر؟

والعمرُ يسرع للغروب

(7)

أبتاهُ .. لا تحزن

فقد مضت السنين

ولم أصلِّ .. في الحسين

لو كنتَ يا أبتاهُ مثلي

لعرفتَ كيف يضيع منا كلُ شيء

بالرغم منا .. قد نضيع

بالرغم منا .. قد نضيع

من يمنح الغرباءَ دفئاً في الصقيع؟

من يجعل الغصنَ العقيمَ

يجيء يوماً .. بالربيع ؟

من ينقذ الإنسان من هذا .. القطيع ؟

(8)

أبتاهُ

بالأمس عدتُ إلى الحسين

صليتُ فيه الركعتين

بقيت همومي مثلما كانت

صارت همومي في المدينةِ

لا تذوب بركعتين

مترو الأنفاق..وما أدراك ما مترو الأنفاق

كنت نازلة رايحة مشوار وبعدين قلت أروح اركب المترو بقالي كتير مركبتوش بعد اما كنت لمدة أربع سنين كل يوم لازم اركبه وانا رايحة الجامعة...المهم نزلت المحطة وجيت وانا رايحة عند عربيات السيدات اللي متعودة انهم أول عربيتين في المترو لقيت في شباب ورجالة واقفين بصت لهم كدة باستغراب واستنفار بصراحة وبعدين سألتهم هي مش دي عربيات السيدات بصولي بنظرة كأنهم بيقولولي انتي مش عايشة في الدنيا ولا ايه؟!!! وردوا وقالولي لأ بقت قدام امشي قدام هتلاقيها ففضلت ماشية أدور لغاية ما لقيتهم الصراحة عاملين الواجب وحاطين يافطة مكتوب عليها "للسيدات فقط" بس برضو بأبص لقيت شباب ورجالة واقفين...وبعدين بقا في اليوم اللي مش باين دة ما انا كنت قاعدة عاملة بيات شتوي وصيفي وكل الفصول في بيتنا أحسن...لقيت مدام واقفة رحت سألتها هي مش دي عربيات السيدات قالتلي "المفروض!!!" قولتلها يعني ايه المفروض قالتلي يعني من ساعة ما عملوا القرار الغريب دة وان عربيات السيدات تبقى في نص المترو وهيا بقت سايحة!!!! قولتلها سايحة يعني ايه مش فاهمة؟!! قالتلي يعني القرار مش بيتنفذ وتبقى العربيات دي للسيدات بس الا لو كان في عسكري وهو اللي يقولهم دي عربيات سيدات!!!!!!

ممكن نفهم بقا ايه لازمة القرار الغريب دة ما العربيات كانت في أول المترو ومعروفة ومستريحين ايه لازمتها تتحط في النص كدة وانتو عارفين يعني ان احنا شعب مش بسهولة ينفذ القوانين ويمشي عليها ولا انتو فاضيين وخلاص حليتوا كل مشاكل البلد ووقفت خلاص على المترو ولا قولتوا أهو تغيير عشان الناس متزهقش ولا ايه، وسمعت ناس بتقول ان كدة احسن لسواق المترو عشان عربيات السيدات بيركب فيها أطفال وبيعملوا دوشة كتير!!!! يا سلاااااام هو بيسوق فوق الأرض عشان محتاج تركيز دة بيسوق تحت الأرض وفي طريق محدد وبيبقى مفيش الا هو يعني ولا في زحمة ولا متروهات تاني هتضايقه وبعدين اعتقد يعني انا بصيت مرة وانا راكبة في العربية الأولى على السواق من الازاز قلت اما اشوف بيعمل ايه " حشرية معلش استحملوني" لقيته قاعد حاطط ايده ومشبكها ورا راسه ومستريح اوي كدة والمترو ماشي لوحده يعني المترو ماشي اوتوماتيك يبقى ازعاج ايه بقااا!!!!!!!

ارحمونا يا رب يخليكوا من قراراتكوا اللي كترت أوييي اليومين دول واللي اغلبها ملهاش لازمة، أما الرجالة بقا ففي كلمة هتموتني بصراحة يعني انتو عندكوا المترو كلووو حوالي 12 عربية او اكتر سيبتوها كلها ومفيش الا العربيتين اليتيمتين بتوع السيدات ولا هيا تلاكيك ومحدش منكوا يقولي اشمعنا انتوا بتركبوا معانا عشان هاقولكوا سوري معلش احنا مش بنضايقكوا لو ركبنا معاكوا زي المضايقات اللي بنشوفها منكوا وانتوا فاهمين قصدي طبعاااا.

لا لعيد الأم

بــــــحبـــــــك يا ماما مهما قولت ولا عبرتلك مش هقدر أوفيكي حقك طبعا، يعني يكفي 23 سنة مستحملاني وشايلة همومي ومشاكلي ومش هنسى فضلك عليا ولا وقفتك جنبي ربنا يخليكي ليا واشوفك دايما بأفضل صحة وأفضل حال....

بس كان لازم أوضح كدة، أنا ولا متعقدة ولا عندي أي مشكلة مع أمي ربنا يخليها ليا يارب، بس كل الموضوع أني بأقول رأيي.... بصراحة أنا مش عاجبني موضوع عيد الأم دة ولا الاحتفال بيه وليا أسبابي اللي هيا:

أولا: هي الأم -أمنا- محتاجة يوم واحد بس في السنة عشان نعبرلها عن حبنا فيه...دي الأم ميكفيهاش ولا حتى السنة كلها ولو فضلنا حياتنا كلها كل ثانية منها نشكرها برضو مش هيكفي يبقى ليه نحصره في يوم

ثانيا: ودي أهم حاجة يا جماعة بجد احنا لازم نقدر الناس اللي مامتهم الله يرحمها توفاها الله أو حتى الأمهات اللي ولادهم بعاد عنهم أو الأولاد اللي بعاد عن أمهاتهم....طب دول يعملوا ايه؟!!! الله يكون في عونهم الضغط عليهم من كل ناحية سواء الإعلام أو المحلات التجارية أو كل حتة... دة كفاية بس أغنية "فايزة أحمد" "ست الحبايب" اللي بتشتغل قبل عيد الأم بأسبوع أو أسبوعين الأغنية دي لوحدها كفاية عليهم...طب ليه العذاب والضغط النفسي دة؟!!

أنا مش ضد فكرة اننا نعبر عن حبنا لأمنا بالعكس دة المفروض يحصل كل يوم مش يوم واحد بس في السنة، انما ضد فكرة حصر التعبير عن مشاعرنا وتقديرنا وحبنا لأمنا في يوم المسمى ب "عيد الأم"

ودة زي أي عيد احنا اخترعناه برضو زي "الفالنتين داي" أو "عيد الحب" هو كمان ايه لازمته.. هو الحب كمان ليه يوم واحد بس!! الحب موجود في أي وقت وأي زمان ، مش يوم واحد الدنيا بتتقلب فجأة تبقى كلها حمراء..ورد أحمر..دباديب حمراء..قلوب حمراء، تقولوش جاتلنا الحصبة كلنا فجأة كدة

أنا من رأيي أن كل الأعياد دي اتعملت لغرض واحد بس هو "الدعاية الترويجية لبعض المنتجات وتحريك الأسواق الراكدة" يعني فكرة الأعياد دي كلها "بالمناسبة أغلبها صاحب فكرتها هما الأخوين علي ومصطفى أمين مؤسسي دار أخبار اليوم"، الموضوع كله اقتصاادي وممكن يكون ليها بعد سياسي كمان ولا كان يهمهم مشاعر ولا حاجة

ثالثا: سيبكوا من كل كلامي دة لو مش مقتنعين بيه وتعالوا نبص للدين اللي المفروض ان احنا نمشي عليه في كل شئون حياتنا، الدين بيقول ان احنا كمسلمين ملناش الا عيدين بس هما اللي نحتفل بيهم اللي هما "عيد الفطر" و "عيد الأضحى" ودي مقالة انا لقيتها بتتكلم في الموضوع من وجهة النظر الدينية للي عايز يرجعلها

كلمة أخيرة في النهاية:

"ألـــغـــوا عيد الأم..الأم ليست قيمتها يوم واحد فقط نحتفل بها فيه الأم تساوي العمر كله وهو شئ قليل عليها.. ومراعاة لشعور من فقدوا أمهاتهم أو من فقدن أطفالهن"

عمرو خالد يشن حملة لمكافحة المخدرات بين الشباب

انطلقت فعاليات برنامج (حماية) تحت شعار (المخدرات عدوك القاتل) الذي تنظمه القيادة العامة لشرطة دبي، ويقوم الداعية عمرو خالد بمساعدة الحملة لمواجهة الإدمان في الوطن العربي.

ويرى عمرو خالد أن مشكلة الإدمان تكمن في أن الجهود الحالية المبذولة من جانب الحكومات وأجهزة الشرطة والجهات المتخصصة غير كافية وغير قادرة على تحقيق نتائج ملموسة سواء في إقناع الأصحاء من الشباب ليتجنبوا هذه الآفة أو لإقناع المدمنين الحاليين بان يبدؤوا برنامج العلاج، وأرجع خالد السبب في ذلك إلى أن المشكلة أكبر من أن يقوم بحلها جهاز أو إدارة أو حكومة وإنما يحتاج الأمر إلي مشاركات بين هذه الجهات جميعا ومعها الجهات الشعبية والتطوعية لتهز المجتمع الشبابي كله لفترة محددة ومكثفة ثم تسلم نتائج عملها لهذه الجهات المتخصصة لتتابع عملها بعد هذه الحملة التوعية الشعبية.

تهدف الحملة والتي تمتد لخمسة أسابيع، إلي إشراك المجتمع في جهود التوعية لإبعاد الأجيال الجديدة عن تعاطي وإدمان المخدرات وذلك بالتركيز علي إقناع وتوعية الأصحاء للمحافظة على صحتهم وتوجيه المدمنين ليبدؤوا برنامج العلاج.
كما تهدف الحملة إلي تحفيز ملايين المدمنين ليتشجعوا في المستقبل لبدء برنامج العلاج، وسينتج عن ذلك إنشاء مزيد من المراكز العلاجية لاستيعاب إقبال المدمنين على العلاج وفقا لقانون العرض والطلب.
يعتزم القائمون على الحملة وضع مليون ملصق "استكير" بعنوان "لا للمخدرات" في أماكن تجمعات الشباب مثل النوادي والجامعات والمدارس الثانوية وغيرها من الأماكن العامة الشبابية.
وصممت الحملة ملصقا موحدا سيوضع على مواقع الانترنت المختلفة ليسهل طباعته وتقليده مع وضع عداد على مواقع الانترنت للتأكد من تحقيق المستهدف.
ووجهت الحملة نداءا للمدمنين لبدء برنامج العلاج، مشيرة إلى أنه مستهدف صعب ولكنه قابل للتحقيق.
ويدعم الحملة القيادة العامة لشرطة دبي، ومكتب الأمم المتحدة لمكافحة الجريمة والمخدرات، ومؤسسة رايت ستارت الدولية، بالإضافة إلى رموز الإعلام والثقافة والفن والرياضة.

شئ أخير:

دة موقع الداعية عمرو خالد فيه كل التفاصيل عن الحملة www.amrkhaled.net ، وياريت نقدر نساعد ونحقق هدف الاسبوع الأول من الحملة وهو وضع مليون ملصق بعنوان "لا للمخدرات" والملصق موجود في الموقع ممكن تحملوه وتطبعوه وتحطوه في الجامعة أو المدرسة أو النادي أو أي مكان

ودي كمان أرقام التليفونات الموجودة على الحملة لو حد عايز يتصل ويساعد حد يعرفه انه يبدأ العلاج وأكييييد المعلومات سرية...

0168808001-2-3-4--5-6-7-8-9

الإيميل: hemaya@amrkhaled.net

وفي كمان في مصر الخط الساخن لعلاج الإدمان دة موجود من سنة 2000 بس في كتير ميعرفوش بيه ودة مش تبع الحملة بس برضو ممكن يساعد ودي أرقام التليفونات:

الخط التليفوني الساخن لعلاج الادمان

3041948

3051841

الخط المجاني08003300033

يا ريت بجد كل اللي يقدر يساعد في الموضوع دة أو يقدر يعمل حاجة يعملها، الأرقام مفظعة ومخيفة يعني أخر احصائية قالت ان في في مصر ستة مليون مدمن وطبعا الحقيقة بتكون أكتر من أرقام الاحصائيات بمراحل، وللأسف الغالبية العظمى من العدد دة بتكون من الشباب، لانها بتبقى معروفة لو عايز تضرب اي مجتمع وتدمره وتسيطر عليه سواء سياسيا أو اقتصاديا أو حتى اجتماعيا أضربوا في أكتر فئة نافعة فيه وهي الشباب ..... ودة اللي بيحصل للأسف

celine dion taking chances

دة أخر فيديو كليب للمغنية الرائعة "سيلين ديون" من ألبومها الأخير "taking chances" ، بجد الفنانة دي مهما مرت عليها السنين هتفضل متربعة على القمة بصوتها المميز بجماله وتفرده، يمكن كتير أو الغالبية العظمى مرتبطة عندهم سيلين ديون بفيلم "تيتانك" والأغنية الرائعة اللي غنتها فيه وأنا كنت منهم كان أول تعرف ليا على سيلين ديون من خلال الفيلم وأغنيته "my heart will go on" ، بس بعد كدة بدأت اسمعلها أغاني تانية اثبتت بالفعل ان الفنانة دي أسطورة مش هتتكرر...ومحدش يقدر يحصرها في أغنية أو ألبوم واحد لكن كل أغنية من أغانيها عمل متكامل بذاته، كان أخرها ألبوم "taking chances" اللي مش بس أغنيته الأساسية اللي بتحمل نفس الاسم رائعة جدااا لكن كل أغاني الألبوم اللي من أوله لأخره عبارة عن قمة من المشاعر والأحاسيس والكلمات والألحان الأكثر من روووعة...فحقا صدق من أطلق عليكي "THE SOUL DIVA"

والله وعملوها الرجالة...ورفعوا راس مصر بلدنا

مـــــــــبـــــــــروك لــــــــمصـــــــــــر بطولة كأس الأمم الافريقية 2008

بيب بيب بيب مصر مصر ...أوليه أوليه أوليه أوليه... أوليه أوليه...حسن شحاتة يا معلم خلي الشبكة تتكلم...كلها عبارات كنت تسمعها على ألسنة الشعب المصري كله من كبيره إلى صغيره في ليلة من ليالي العمر بعد فوز المنتخب المصري بكأس الأمم الافريقية-غانا 2008 واحتفاظه باللقب للمرة الثانية على التوالي، ولتظل مصر الملكة المتوجة على عرش القارة الافريقية بكون منتخبها أكثر المنتخبات الافريقية التي حازت على هذه البطولة (6 مرات).

مبروك لمصر كأس الأمم الافريقية 2008

مبروك لمصر التأهل لكأس العالم للقارات

مبروك لحسني عبد ربه أفضل لاعب في كأس الأمم الافريقية

مبروك لعصام الحضري أفضل حارس مرمى في كأس الأمم الافريقية

مبروك لمحمد أبوتريكة أفضل لاعب في المباراة النهائية

مبروك لعصام الحضري ووائل جمعة وحسني عبد ربه ومحمد أبوتريكة وعمرو زكي، وأحمد فتحي وهاني سعيد اختيارهم ضمن تشكيلة منتخب أفريقيا المكون من أفضل اللاعبين في البطولة

إضافة للبوست اللي فات...مصر ترثي اتنين من كبار كتابها

أنا حزينة جداااا ومش عارفة اكتب ايه، بجد النهاردة مصر فقدت اتنين من كبار أعلام الصحافة والثقافة، الأول اللي كتبت عنه البوست اللي فات وهو الكاتب الكبير "رجاء النقاش"، ولسة ملحقتش اخرج من حزني وزعلي عليه لقيت خبر وفاة الكاتب الصحفي "مجدي مهنا" الكاتب الكبير اللي اشتهر بتناوله موضوعات تتعلق بالشأن العام سواء في كتاباته أو تقديمه لبرنامج "في الممنوع" اللي كان بيتعرض على قناة دريم الفضائية

بصراحة الاتنين كانوا بالنسبالي حاجة كبييييرة جدااااا؛ الأول وهو الكاتب "رجاء النقاش" كنت باتابع كتاباته دايما وانتظر مقاله الشهري بلهفة في "مجلة الشباب" ومن أوائل الناس اللي حببوني في الأدب والصحافة واتمنيت من وأنا في ثانوي اني ادخل كلية الإعلام قسم صحافة بالذاااات عشان مش أكون زيهم لأ لاني عمري ما هوصل اني اكون زي العمالقة دول ولكن امشي على خطاهم

والتاني الكاتب ذات القلم الحر "مجدي مهنا" اللي كنت برضو باتابع مقالاته دايما في جريدة الوفد اللي كنت لازم كل يوم اقراها بحكم حب والدي -الله يرحمه- ليها ولقرايتها دايما، حتى بعد ما اختلف "مجدي مهنا" وابتعد عن جريدة الوفد أصبحت باتابع برنامجه على قناة دريم واللي كان بيناقش فيه كل أمور السياسة والاقتصاد وكل شئون البلد

وداعا "رجاء النقاش" ووداعا "مجدي مهنا" ورحمكما الله وليعوضنا عنكما كتاب وصحفيين شرفاء يعبروا عن أمال وآلام المجتمع وهمومه ومشاكله وقضاياه ولو ان هذا الشئ أصبح قليلا بل نادرا في هذه الأيام