افـــــرجــــــوا عن إســــــراء

بنت مصرية عادية محدش كان يعرفها، في الأيام الأخيرة انتشرت صورها في أغلب المدونات والمواقع الالكترونية بيطالبوا بالافراج عنها هي وأصحابها سألت نفسي مين إسراء ووصلت للإجابة النهاردة لما لقيت جروب ليها على الفيس بوك وعرفت انها صاحبة فكرة إضراب 6 أبريل وهي اللي روجت للفكرة على العديد من المواقع لغاية ما انتشرت ونجحت النجاح اللي كلنا شوفناه، وكان جزائها إلقاء القبض عليها هي ومجموعة من أصدقائها والله أعلم هما فين ولا بيتعمل فيهم إيه دلوقتي، كل مشكلتها انها حاولت تعبر عن رأيها في اللي بيحصل في البلد واللي الناس شايفاه فيها في الأونة الأخيرة، كل مشكلتها انها فكرت اننا في بلد ديمقراطية بتسمح بحرية الرأي والتعبير زي كل الدول الأوروبية اللي موضوع الإضراب دة شئ عااادي جداا عندهم وبيحصل في أغلب الأوقات، كل مشكلتها انها يمكن صدقت كذبة حرية الرأي والتعبير اللي بينص عليها القانون والدستور وكل خطب وكلام الكبار اللي بيقولوه بس لما تكون الانتخابات داخلة عشان ينجحوا ويكسبوا بيه الناخبين، هيا عملت إيه؟!! هيا ولا دعت لتخريب ولا لعمل مشاكل، إنما للأسف افتكرت اننا عايشين في بلد متقدمة وفيها حرية

إحنا معاكي يا إسراء ولو قبضوا عليكوا عشان يخوفونا احنا مش هنخاف وهيطلع من شباب مصر مئات وآلاف زي إسراء...

ومعادنا الإضراب القادم 4 مايو إن شاء الله ...متنسووووووش