كنت نازلة رايحة مشوار وركبت تاكسي ودار بيني وبين سائقه -وهو عبارة عن شاب في نهاية العشرينات- هذا الحوار "إيمانا مني بمبدأ انك ممكن تعرف كل اللي بيحصل في مصر من سائقي التاكسي":
أنا: نقابة الصحفيين
السائق: اتفضلي
السائق: انتي صحفية
أنا: بصراحة آه ولأ
السائق:؟؟؟؟؟ معلش اعذريني ازاي يعني؟
أنا: يعني لسة رايحة meeting وبناءا عليه هيتحدد هاشتغل معاهم ولا لأ
السائق: ربنا معاكي... بس انتي إهتماماتك إيه يعني لو اشتغلتي هتكتبي في إيه؟
أنا: القضايا الاجتماعية والثقافية..قضايا الشباب..المرأة والطفل..وباحب كمان موضوعات التكنولوجيا الحديثة وعلوم الكمبيوتر
السائق: أصل أنا باحب الصحافة وحاولت اشتغل في جريدة قبل كدة بس في مجالي ومنفعش
أنا: بإستغراب... ليه هو مجالك ايه؟
السائق: أنا معايا بكالوريوس تجارة..(وبصوا الجاية دي صدمتني بصراااحة) وماجيستير في التسويق
أنا: ايييييييييييييييييييه؟!!!!!!!! بكالوريوس وماجيستير كمان...ومع احترامي الكااامل لشغلتك بس دة مش مكانك ابداااا
السائق: وهو مين بيشتغل في مجاله دلوقتي؟!!
أنا: أيوة بس معلش برضوو مفيش أي مكان أو أي شركة قدرت تشتغل فيها
السائق: اشتغلت كتييييير بس كلهم طلعوا شركات نصب وأي كلام والشركات الكبيرة لازم واسطة كبيرة عشان اقدر اشتغل فيها..وبصراحة اخر ما زهقت مبقتش أدور أنا عايز أهاجر وأسيب البلد كلها
أنا: بصراحة عندك حق..بس عايز تروح فين؟
السائق: حاولت أروح أمريكا بس منفعش
أنا: ليه طيب؟!
السائق: للأسف منجحتش في إمتحان السفارة ما انتي عارفة بيعقدوها عشان ما نسافرش...بس اتعرض عليا أسافر دول أوروبية تانية بس بطرق غير مشروعة فموافقتش
أنا: لاااااااا الله يخليك انت مبتشوفهمش بيجرالهم ايه وبيرجعوا في صناديق..خليك البلد دي أحسن من غيرها
السائق: ولا أحسن ولا حاجة...بس ما باليد حيلة!!!
أنا: ربنا معاك وحاول تاني ومتيأسش
السائق: إن شاء الله
ووصلت المكان اللي كنت عايزاه وأنا جوايا كم أحاسيس متناقضة بطريقة غريييبة...إحساس بالغيييظ...وإحساس بالحزن...وإحساس بالألم...وإحساس بالضيق على مستقبل الشاب دة، مش عارفة هو إحنا وصلنا للدرجة دي!!!، نفسي بس حد من المسئولين الكبار ينزل ويشوف اللي بيحصل في البلد دي حالة بسيييطة جداا...ليهم حق يلجأوا للمخدرات..ليهم حق يهاجروا ويضحوا بنفسهم وناس يستغلوهم ويرجعوا في صناديق..ليهم حق يروحوا يتجوزوا الأجنبيات اللي أد أمهاتهم عشان ياخدوا الجنسية منهم وفي الغالب مبياخدوهاش...ولسسسسسسسة هيحصل لشبابك يا مصر.
ملاحظة أخيرة: أنا كنت بافكر أكمل الماجيستير بتاعي بما اني نجحت في السنة التمهيدية والمفروض اختار فكرة وأكمل بس بعد الحوار دة بافكر جدييييا اني مكملش...ملهاااااااش لاااازمة بلا وجع قلب وصداع.
ليست هناك تعليقات:
إرسال تعليق