دراسة رسمية تكشف وجود ستة ملايين مدمن مخدرات في مصر(هههههههههه ستة مليون بس اشك في الموضوع دة)

"افادت دراسة رسمية نشرتها الصحف الاربعاء ان عدد مدمني المخدرات في مصر يقدر بستة ملايين اي 8,5 في المئة من عدد السكان.
وافاد تقرير للمجلس الوطني لمكافحة ادمان المخدرات ان 439 الف ولد يتعاطون المخدرات بشكل منتظم في مصر الدولة المستهلكة والمنتجة لشتى انواع المخدرات.
والبانجو الشبيهة بالماريجوانا هي الاكثر استهلاكا في مصر. الا ان الكوكايين والهيرويين والمخدرات الاصطناعية مثل حبوب الهلوسة منتشرة ايضا في الاسواق المحلية.
ومن اصل 12,2 في المئة من التلاميذ الذين اكدوا للمحققين انهم يستهكلون المخدرات قال 9 في المئة انهم يدخنون البانجو و3 في المئة الحشيش و0,21 في المئة المخدرات الكيميائية او الهيرويين.
وبحسب وكالة الامم المتحدة لمكافحة المخدرات والجريمة فان موقع مصر الجغرافي يجعلها مركزا لعمليات تهريب الهيرويين والقنب الهندي من جنوب شرق اسيا الى اوروبا.
واكدت الوكالة ان زراعة البانجو منتشرة على مساحات واسعة في سيناء مع وجود حقول شاسعة من الافيون في شبه جزيرة سيناء"

دة نص الدراسة اللي نشرتها اغلب الصحف ومواقع الانترنت -والتي يقال عنها انها رسمية- عن عدد مدمني المخدرات في مصر، بس على فكرة أنا من وجهة نظري أن الرقم دة مش صح خالص لأن ببساطة عدد مدمني المخدرات في مصر بيفوق الرقم دة بمراحل دة الستة مليون دول ممكن يكونوا الشباب بس ولو ان الشباب برضو عددهم اكتر من كدة صدقوني يا جماعة دة بقا وباء منتشر في البلد بطريقة غريبة وفظيعة ولازم حل جذري وعاجل للمشكلة دي والا قولوا على البلد السلام.

الملفت للنظر بقا بجد والغريب واللي يبين حجم المأساة التي نعيشها هي التعليقات اللي علقها قراء الموضوع في السايت بصوا دي نماذج بسيطة من المكتوب:

" ربنا يستر علينا ده كل شله بيكون اكثر من نصها ضريبه "-

"الشعب كله بيحشش مش 6 مليون وبس والطف بينا يارب"-

"والله ياجماعة الموضوع عادى جدا تعالوا شوفوا فى اسكندرية مفيش شارع ولا ناصية الا وتلاقى واحد واقف يبص على اللى رايح واللى جاى بيتعرفوا على طول تدخل عليه تقوله ايه اخبار الشغل ودا كلمة السر بين كل التجار والزباين يقولك تمام ياخد طبعا على اى شارع جانبى ويطلع من جيبه منديل قماش فيه حوالى من 10 الى20 حته حشيش تختار منها الحجم اللى يناسبك ولو انت زبون دايم معاه ممكن يديك حته هديه والموضوع عادى جدا دا حتى انا داخل شارع من الشوارع دى فى يوم انا 2 زمايلى فكرونا تبع الشرطة بصيت لقيت واحد راح مصفر ولقيت اكتر من 3 بيجروا فواحد بتاع سوبر ماركت قلنا دول فكروكوا حكومه فالموضوع بقى عادى جدا جدا"

-"كلامك غلط يا مان سوري يعني مفيش حاجة اسمها تفكك اسره , انتا عايش ومش عارف تعمل ايه لا شغل ولا جواز ولا فلوس تفتكر حتى لو اهلك ربوك هتمشي جنب الحيط؟ اكيد لا يا مان وهتضرب حشيش وكل انواع المخدرات علشان تخرج من حاله الزهق والقرف الى انتا فيها انا بعمل كدا كل لما بفوق بشرب تانى "

-"بانجو ايه بس هو في حد بيشرب بانجو دلوقتي الحكومه مش حرمانا من حاجه ودعمو الحشيش وبقي في متناول الفقير والغني خلي الناس تتكيف عقبال العيش لاما يدعم وكمان 6 مليون ايه بس دانا الي اعرفهم اكتر من كده ويلا بقي عشان انا رايح اصبح واعمل الدماغ الصح عشان انسي الي احنا فيه انا نفسي اعيط اهي اهي اهي"

-"وبعدين علي فكرة مبقاش في حد في البلد مبقاش بيشرب مخدرات انا مش عارف الإحصائية دي جاية منين لوتجار المخدرات القطاعي بيقدموا اقرارات ضريبية كنتوا ظبتوا النسبة وعرفتوا تحسبوها صح وبعدين نبطل مخدرات ليه دا احلي حاجة في الحشيش ده انه مفيهوش بذر ..... حبيبي ياابو نسمة "

-"وماله الحشيش ده حتى الدماغ اللى بلا كيف تستاهل قطعها بالسيف وعلى رأى الاغنية اللى بتقول حشيش حاجه تيجى كده اهدى حبيبى كده........ "

-"على فكره اكتر من نص شباب مصر وانا منهم بنلم من بعض فلوس من دلوقتى عشان نجيب مخدرات ليوم الواقفه"

-"انا واحد من الستة مليون دول ادمنت المخدرات لسبب بسيط جدا خطيبتي رمتنى , مفيش شغل , مفيش شقة ,مفيش فلوس , ودلوقتى انا عامل دماغ مخلايني هتلررررررررر "

-"يعملوا إيه يعني . مش أحسن ما يقفوا قدام فرن العيش من س 7 الصبح للساعة 12 الظهر وفي الاخر ميعرفش يجيب. _ لكن البانجو تليفون واحد ويجيلوا لحد عنده "

-"هههههههههه كل شاب اتخرج مش لاقى شغل عاوزو يعد يعمل ايه ؟ يقشر بصل ؟ طبعا اكيد لازم يعد ويحشش ويضرب بانجو وحشيش وافيون وكلو لانو عندو وقت فراغ وماعندوش حتى الشغل اللى بيه يكون نفسو ويتجوز ويتلم من الشارع لكن تقولو ايه فى بلدكم الجميلة ههههههه "

تفتكروا هقدر اقول حاجة بعد كدة، الكلمة الوحيدة اللي ممكن تعبر عن الكلام اللي فوق دة هي "لا تعلييييييييق" الأزمة مش أزمة ادمان المخدرات ولا عدد المدمنين ولا اننا من اكبر الدول المصنعة أو المستهلكة للمخدرات لأ دة داخل فيها الاحباط والمعاناة اللي الشباب بيعانوها وعدم وجود وظائف والحالة الاقتصادية وعوامل تانية كتيييييييير يعني كأننا بندور في دايرة مغلقة أو زي ما قال مروان خوري في فيلم أوقات فراغ "بنلف في دواير ودايما ننتهي لمطرح ما ابتدينا وندور ندور ندور"