بجد القيصر هيفضل طول عمره قيصر*

بصراحة انا بحاول على طوووووووول اني اكون محايدة يعني اقول رأيي بصراحة وجرأة بس من غير تحيز لحد على حساب حد بس المرة دي مقدرش لازم أكون متحيزة لأني مش باكلم على انسان عادي أنا باتكلم على حد أنا عن نفسي اتربيت على صوته وأغانيه، ومن الأخر كدة احنا عيلة قيصرية (ملحوظة الكلام طبعا عن بنات وأمهات العيلة يعني عن الجنس اللطيف لكن الجنس الخشن ملناش دعوة بيه بيغيروا منه طبعاااااا) بس مش مصدقني طب أنا هحكيلكوا الحكاية وأنتوا احكموا:

في يوم وأنا صغيرة مش فاكرة كنت في سنة كام في المدرسة بس تقريبا يا ابتدائي يا اعدادي مش أكتر من كدة المهم كنا بنتفرج على التليفزيون فجأة لقينا مطرب جديد بيغني اللي لفتنا انه كان بيغني لعبد الوهاب أغنية "بفكر في اللي ناسيني" ايه دة ايه الصوت الأكثر من رائع دة وازاي مطرب في أول ظهور ليه في مصر يجرؤ على الغناء لقمة زي عبد الوهاب، وسألنا على اسمه لغاية ما عرفنا هو مين ودة طبعا عن طريق خالتو (أخت ماما الصغيرة) واللي اتعرفت فيما بعد في العيلة بمجنونة كاظم الساهر هيا اللي عرفتنا بيه وقالتلنا انه مطرب عراقي واسمه كاظم الساهر ومن هنا بدأت حكاية عشقنا لكاظم الساهر اصبحنا نتابع أخباره وألبوماته أولا بأول وطبعا أغلبها بيوصلنا عن طريق خالتو اللي قلتلكوا عليها ويا سلااام بقا لو في حفلة في التليفزيون لكاظم كان بيبقى يوم طوارئ عندنا في العيلة أنا طبعا كنت بابقى مجهزة نفسي ومحضرة الفيديو والشرايط عشان لاااازم الحفلة تتسجل ولغاية دلوقتي ساعات باطلع شرائط الفيديو دي واقعد اتفرج عليها، وعلى الرغم من ان الحفلة كان ممكن تتعاد سواء كلها أو جزء منها في التليفزيون تاني يوم وعلى الرغم من انها كانت شايفاها لسة الا لاااازم تقعد وتسمعه تاني ويا سلااااااام بقا لو حد فتح بقه بكلمة وكاظم بيغني مش هيخلص من خالتو (مش باقولكوا مجنونة كاظم الساهر).
حتى ماما اللي مبتحبش المطربين الجداد وكل سماعها للقدام بس وعمري ما شفتها في حياتي اشترت ألبومات إلا لأم كلثوم بس لقيتها في يوم داخلة ومشترية البومات لكاظم الساهر وطبعا عارفين مين اللي قالها على اساميهم "خالتووووو أكييييييد".

زمانكوا بتقولوا ايه اللي فكرها بكل دة واشمعنى دلوقتي بالذات....تصدقوني لو قلتلكوا معرفش او يمكن أحد الأسباب لما فتحت الكمبيوتر عندي وملقيتش غير الالبوم الاخير لكاظم ساعتها اتصدمت وقولت معقولة وبدأت انزل أغانيه كلهاااااااا ورجعت أسمعها تاني ياااااااه متتصوروش أد ايه كان احساسي حسيت اني باعمل إعادة اكتشاف لكاظم الساهر، احساس غريب وأنا باسمع "بعد الحب" أو "زيديني عشقا" أو "أنا وليلى" أو "كثر الحديث" دة حتى في أغاني أكثر من رائعة جديدة أول مرة اسمعها زي "سيدة عمري" و"حوار مع النفس".
بجد ساعتها حسيت أد ايه الفنان دة عملاق لأن الوصول للقمة وأن المطرب أو المغني يعمل أغاني تضرب في وقتها سهل جدااا لكن ان أغانيه تستمر كدة صعب جدااا، بدليل وجود العشرات أو المئات اللي كل يوم بيطلعوا وانتوا عارفينهم طبعا ونجحوا نجااح مفيش اكتر منه لكن تعالوا بقا بعد عشر سنين حاولوا كدة تسمعوا الواوا أو العنب أو العب طبعا مفيش حد هيسمعهم ولا هيفتكرهم حتى "مع الاعتذار الكبيييييييييير للقيصر طبعا أني ذكرت الأسماء دي وأنا باتكلم عنه".

وفي نهاية كلامي لا أملك سوى التقدم باسمى درجات الشكر والإعجاب لهذا الفنان الأكثر من رائع الذي يحمل على عاتقه رسالة الفن ويهدف إلى توصيلها بأية طريقة "تحياتي لك يا قيصر الكلمة واللحن والصوت والإبداع" واسيبكوا بقا مع الكليب الأخير للقيصر والاغنية الرائعة "ناي"

*إهداء خاص جداااا لخالتو (أخت ماما الصغيرة)