مع ان كل الخلق من أصل طين
وكلهم بينزلوا مغمضين
وكلهم بينزلوا مغمضين
بعد الدقايق والشهور والسنين
تلاقى ناس أشرار وناس طيبين وعجبى
*******
عجبى عليك يا زمن يا أبو البدع
يا مبكى عينى دما
ازاى اختار لروحى طريق؟
وأنا اللى داخل فى الحياة مرغماً وعجبى
*******
مرغم عليك يا صبح مغصوب يا ليل
لا دخلتها برجليا ولا كان لى ميل
شايلنى شيل دخلت أنا فى الحياة
وبكرة هاخرج منها شايلنى شيل وعجبى
*******
أنا شاب لكن عمري ولا ألف عام
وحيد ولكن بين ضلوعى زحام
خايف ولكن خوفى منى أنا
أخرس ولكن قلبى مليان كلام وعجبى
*******
ياما صادفت أصحاب وماصحبتهمش
وكاسات خمور وشراب ومشربتهمش
أندم ع الفرص اللى أنا سبتهم
والا ع الفرص اللى مسبتهمش وعجبى
*******
يا باب أيا مقفول .. امتى الدخول؟
صبرت ياما واللى يصبر ينول
دقيت سنين والرد يرجعلى : مين؟؟
لو كنت عارف مين ... أنا كنت أقول وعجبى
*******
سهير ليالى وياما لفيت وطفت
فى ليلة راجع فى الظلام قمت شفت
الخوف كأنه كلب سد الطريق
وكنت عاوز أقتله بس خفت وعجبى
*******
دخل الربيع يضحك لقانى حزين
دخل الربيع يضحك لقانى حزين
نده الربيع على اسمى لما قلت مين؟
حط الربيع أزهاره جنبى وراح
وإيش تعمل الأزهار للميتين؟ وعجبى
*******
مهبوش بخربوش الألم والضياع
قلبى ومنزوع من الضلوع انتزاع
يا مرايتى ياللى بترسمى ضحكتى
يا هل ترى ده وش ولا قناع؟؟ وعجبى
*******
ليه يا حبيبتى ما بينا دايماً سفر؟
ده البعد ذنب كبير لا يغتفر
ليه يا حبيبتى ما بينا دايماً بحور؟
أعدى بحر ألاقى غيره اتحفر وعجبى
*******
أنا كل يوم أسمع فلان عذبوه
أسرح فى بغداد والجزاير وأتوه
ما اعجبش من اللى يطيق بجسمه العذاب
واعجب من اللى يطيق يعذب أخوه وعجبى
*******
ينبوع وفى الحواديت أنا سمعت عنه
سمعت إنه عجيب وف وسط لهاليب لكنه
شقيت كما الفرسان طرقى لقيت
حتى الخنازير والكلاب شربوا منه وعجبى
*******
يا قرص شمس مالهوش قبة سما
يا ورد من غير أرض شب ونما
يا أى معنى جميل سمعنا عليه
الخلق ليه عايشين حياة مؤلمة وعجبى
*******
شاف الطبيب جرحى وصف له الأمل
وعطانى منه مقام يا دوب ما اندمل
مجروح جديد يا طبيب وجرحى لهيب
ودواك فرغ منى وإيه العمل؟؟ وعجبى
*******
أعرف عيون هيا الجمال والحسن
وأعرف عيون تاخد القلوب بالحضن
وعيون مخيفة وقاسيةوعيون كتير
و باحس فيهم كلهم بالحزن وعجبى
*******
إيش تطلبى يا نفس فوق كل ده؟
حظك بيضحك وأنتى متنكده
ردت قالت لى النفس: قول للبشر
ما يبصوليش بعيون حزينة كده وعجبى
*******
يا حزين يا قمقم تحت بحر الضياع
حزين أنا زيك وإيه مستطاع؟
الحزن مابقالهوش جلال يا جدع
الحزن زى البرد زى الصداع وعجبى
*******
فى يوم صحيت شاعر براحة وصفا
الهم زال والحزن راح واختفى
خدنى العجب وسألت روحى سؤال
أنا مت؟؟ ولا وصلت للفلسفة؟؟ وعجبى
*******
الفيلسوف قاعد يفكر سيبوه
لا تعملوه سلطان ولا تصلبوه
ما تعرفوش أن الفلاسفة يا هوه
اللى يقولوه بيرجعوا يكدبوه؟ وعجبى
*******
إنسان إيا إنسان ما أجهلك
ما أتفهك فى الكون وما أضألك
شمس وقمر وسدوم وملايين نجوم
وفاكرها يا موهوم مخلوقه لك؟؟ وعجبى
*******
وقفت بين شطين على قنطرة
الكدب فين والصدق فين يا ترى؟
محتار أموت ، الحوت خرج لى وقال
هوا الكلام يتقاس بالمسطرة؟ وعجبى
*******
نسمة ربيع لكن بتكوى الوشوش
طيور جميلة بس من غير عشوش
قلوب بتخفق إنما وحدها
هيا الحياة كده كلها فى الفاشوش وعجبى
*******
يا طير يا عالى فى السما طز فيك
ما تفتكرش ربنا مصطفيك
برضك بتاكل دود وللطين تعود
تمص فيه يا حلو ويمص فيك وعجبى
*******
يومى على الله تنتهى وتغيب
الشمس .. وتعود تانى يوم لهاليب
زى الحياة مأساة ومن كترها
بقى لا انتهاءها ولا ابتداءها عجيب وعجبي
*******
نظرت فى الملكوت كتير وانشغلت
وبكل كلمة ليه؟ وعشان إيه؟ سألت
اسأل سؤال ارد يرجع سؤال
وأخرج وحيرتى أشد مما دخلت وعجبي
*******
خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا وحى بيصير تراب
الأصل هوا الموت ولا الحياه؟؟ وعجبى
*******
قطى العزيز راقد على الكنبات
فى نوم لذيذ .. وبيلحس الشنبات
وانا كلّ عين فنجان مدلدق قلق
صدق اللى قال إن الحياة منابات وعجبى
*******
ياللى انت بيتك قش مفروش بريش
تقوى عليه الريح . يصبح مفيش
عجبى عليك حواليك مخالب كبار
وما لكش غير منقار وقادر تعيش وعجبى
*******
بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت قالوا مفيش
غير بس هو الحب قارب نجاه وعجبي
*******
كان فيه قمر كأنه فرخ الحمام
علي صغره دق شعاع شق الغمام
أنا كنت حاضر قلت له ينصرك
إشحال لما حتبقي بدر التمام وعجبي
*******
ياللي عرفت الحب يوم و انطــــــــــــوي
حسك تقول مشتاق لنبع الهـــــــــــــــوي
حسك تقول مشتاق لنبع الغــــــــــــــــرام
ده الحب .. مين داق منه قطره...ارتوي وعجبي
*******
انا الذي عمري اشتياق في اشتيـــاق
و قطر داخل في محطة الـــــــــفراق
قصدت نبع السم وشربت ســـــــــم
من كتر شوقي وعشمي في التريـــاق وعجبي
*******
أوصيك يابني بالقمر و الزهـــــــــــــور
أوصيك بليل القاهرة المسحـــــــــــــور
و إن جيت في بالك .. إشتري عقد فل
لأي سمرا.. وقبري إوعك تـــــــــزور وعجبي
*******
لا تجبر الانسان ولا تخيره
يكفيه ما فيه من عقل بيحيره
اللى انهارده يطلبه ويرضاه
هو اللى بكرا حيشتهى يغيره وعجبي
*******
كيف شفت قلبى والنبى يا طبيب
هَمَد ومات والا سامع له دبيب
قاللى لقيته مختنق بالدموع
ومالوش دوا غير لمسه من إيد حبيب وعجبى
*******
عينى رأَت مولود على كتف أُمه
يصرُخ تهنِّن فيه يصرخ تضمُّه
يصرخ تقول يا بْنى ما تنطق كلام
ده اللى ما يتكلمش يا كتر همُّه وعجبى
*******
ولدى نصحتك لما صوتي اتَنَبح
ولدى نصحتك لما صوتي اتَنَبح
ما تخافش من جِنِّى ولا من شَبَح
وإن هبّ فيك عفريت قتيل إسأَله
ما دافعش ليه عن نفسه يوم ما اندبح ؟ وعجبى
*******
حاسب من الأحزان و حاسب لها
حاسب على رقابيك من حبلها
راح تنتهى و لابد راح تنتهى
مش أنتهت أحزان من قبلها وعجبى
*******
قالوا الشقيق بيمص دم الشقيق
والناس ما هيَّاش ناس بحق وحقيق
قلبى رميته وجبت غيره حجر
داب الحجر .. ورجعت قلبى رقيق وعجبى
*******
غمض عينيك وارقص بخفة ودلع
الدنيا هى الشابّة وانت الجدع
تشوف رشاقة خطوتك تعبدك
لكن انت لو بصيت لرجليك .. تقع وعجبى
*******
يا عندليب ما تخافش من غنوتك
قول شكوتك واحكى على بلوتك
الغنوة مش حتموتك إنما
كتم الغنا هو اللى ح يموتك وعجبى
*******
دخل الشتا و قفل الببان عالبيوت
و جعل شعاع الشمس خيط عنكبوت
و حاجات كتير بتموت فى ليل الشتا
لكن حاجات اكتر بترفض تموت وعجبى
*******
يأسك و صبرك بين ايديك.. وانت حر
تيأس .. ما تيأس.. الحياة راح تمر
أنا دقت من ده ودا.. عجبي
لقيت الصبر مر .. و اليأس برضك مروعجبي
*******
ايه اللي خدته من مرور السنين؟؟
يا قلبي الا دمعتك.. و الأنين
بتئن.. و ترجع و بتفرح و ترجع تحن
مع ان مش كل البشر فرحانين وعجبي
*******
تسلم يا غصن الخوخ يا عود الحطب
ييجى الربيع تطلع زهورك عجب
و انا ليه بيمضى ربيع و ييجى ربيع
و لسه برضك قلبى حتة خشب وعجبى
*******
انشد يا قلبى غنوتك للجمال
و ارقص فى صدرى من اليمين للشمال
ماهوش بعيد تفضل لبكره سعيد
ده كل يوم فيه الف الف احتمال وعجبى
*******
يا ميت ندامة ع القلوب الخلا
لا محبة فيها و لا كراهة و لا
حتى يا قلبى الحزن ماعدش فيك
معلهش..لك يوم برضه راح تتملا وعجبى
*******
حقرا و فوق كوكب حقير محتقر
فى الكون تكون دنياكو ايه يا بقر
رملاية من صحرا؟ لكين ايش تقول
و الكون بحاله جوه عقل البشر وعجبى
*******
علقت فى المسمار قناع مهزلة
و معاه قناع مأساة بحزنه ابتلى
بصيت لقيتهم يشبهوا بعضهم
و اهو ده العجب يا ولاد و الا فلا وعجبي
*******
أنا كنت شئ و صبحت شئ ثم شــئ
شوف ربنا .. قادرعلي كل شـــــــئ
هز الشجر شواشيه ووشوشني قال:
لابد ما يموت شئ عشان يحيا شئ وعجبي
*******
انا اللى بالامر المحال اغتوى
شفت القمر نطيت لفوق فى الهوى
طلته ما تطلتوش ايه انا يهمنى
وليه مادام بالنشوى قلبى ارتوى وعجبي
شفت القمر نطيت لفوق فى الهوى
طلته ما تطلتوش ايه انا يهمنى
وليه مادام بالنشوى قلبى ارتوى وعجبي
هناك تعليق واحد:
إرسال تعليق