خلص المسلسل اللي أثار ضجة جامدة جداا بعد عرضه وهو المسلسل اللي بيحكي قصة حياة "الملك فاروق" وبيأرخ لفترة مهمة من تاريخ مصر المعاصر...طبعا انتهى المسلسل اللي اغلبنا اتفرج عليه لكن المشكلة مش في النجاح منقطع النظير اللي حققه المسلسل أو أبطاله أو الوجه الجديد المتألق اللي قدمه للوسط الفني وهو بطل المسلسل "تيم الحسن" ...بغض النظر عن كل دة الصدمة الكبرى اللي اغلبنا اتصدمها ان احنا عشنا دة كلوووو واخدين فكرة غلط عن أخر ملك فعلي حكم مصر -قبل تنازله عن الحكم لابنه الملك السابق "أحمد فؤاد"- الفكرة اللي كلنا كوناها عنه انه كان ملك فاسد وعميل ومرتشي دة غير الاشاعات المتعلقة بحياته الخاصة وعلاقاته النسائية المتعددة، واللي كانت بتصوره انه طول اليوم يا اما بيشرب أو طول الليل في النوادي والملاهي الليلية، وكل دة طبعا من كتب التاريخ اللي كانت بتدرسلنا في المدارس لدرجة ان كل الجيل اللي معاصرش فترة الملك فاروق أول ما تجيب سيرته قصاده هتلاقي ان الصورة المتكونة عندهم عنه سيئة للغاية وانا كنت واحدة منهم.
الصدمة بقا ان جه المسلسل اللي اثبتلنا عكس كل دة وشوفنا صورة مغايرة تماما عن "الملك فاروق" وأد ايه انه كان في أغلب الأوقات بيقدم مصلحة الشعب المصري على معظم قراراته وانه كان ملك محبوب من الناس، أما بالنسبة لموضوع الشرب والخمر فطلع كدب وان الملك فاروق عمره ما داق طعم الخمر وكان بيرفض تماما انه يشربها، حتى كمان علاقاته انسائية اتقال ان الكلام دة كلو غلط، وبالنظر لمؤلفة المسلسل وهي "د.لميس جابر" اللي ليها وزنها في التأليف الدرامي وانها مش معقولة تقول كلام غلط، وغير كدة كمان المسلسل أشرف عليه وراجع مادته التاريخية "د.يونان لبيب رزق" المؤرخ الكبير اللي اسمه يكفي على أي عمل تاريخي عشان يثبتلنا صدقه، بس برضو أنا مسكتش قولت اشوف يمكن يكون الكلام مش صح فعملت سيرش عن الملك فاروق طبعا المادة اللي طلعت عنه قليلة جداا وأغلبها نفس الكلام...بس أهم حاجة طلعتلي هيا موقع "الملكة ناريمان" الزوجة التانية للملك فاروق وأم أخر ملك لمصر وهو "أحمد فؤاد"، واللي لقيت فيه حوار معمول مع "الملكة ناريمان" نفسها قبل وفاتها وأكدت فيه صدق الكلام أنه عمره ما شرب ولا كان ليه علاقات متعدد ة زي ما اتقال، يمكن السبب في اللي حصله أو الغلطة اللي عملها انه وثق زيادة عن اللازم بالحاشية اللي كانت حواليه واللي كان فيها فعلا ناس فاسدين وان الفترة الأخيرة من حكمه كانت عصيبة عليه وأخد فيها العديد من القرارات الغلط زي تغيير 4 حكومات في 6 أشهر بس، ونفس الكلام أكدته "الملكة فريدة" الزوجة الأولى للملك فاروق اللي اكدت انها لو كانت موجودة بجواره مكانتش خلته يتنازل عن العرش ابدا ومكانش دة حصل لفاروق بل كانت هتنصحه باستخدام حرسه الملكي للدفاع عنه الأمر اللي شوفنا ان فاروق رفضه ورفض كمان الاستعانة بعناصر الجيش الأخرى وعلل دة انه مش عايز يشوف الجيش بتاعه بيقتل في بعضه!!!، ولاحظوا حاجة ان الاتنين اتطلقوا منه وهو عايش يعني مفيش واحدة منهم ليها مصلحة انها تجمل صورته بالعكس دة كان ممكن موضوع الطلاق دة يخليهم يشوهوا صورته.
بس أكيد "الملك فاروق" مكانش ملاك يعني لأن كل حاكم وليه مميزاته وعيوبه، لكن المفروض ان يعاد صياغة التاريخ بموضوعية بعيدا عن اي توجهات سياسية للمؤرخين وتتقدم الصورة الحقيقية للحكام بغض النظر عن فترات حكمهم أو نظامهم السياسي كان ايه، ومنكتفيش بمسلسل على الرغم من النجاح الكبير اللي حققه لكنه ممكن يتنسي في النهاية أو يعتبر مصدر غير تاريخي لا يستطيع الباحثين والمؤرخين الرجوع ليه وتفضل الصورة المشوهة اللي اترسمت عن شخص وفضلت طوال 55 سنة!!!، وميحصلش دة مع "الملك فاروق" بس لكن مع كل الشخصيات التاريخية الموجودة في تاريخنا، وميبقاش عندنا زي ما كانت إحدى دكاترتنا في الكلية بتقولنا "إن الدراسة أو البحث في التاريخ من أصعب المجالات لأن كل عهد أو مرحلة تاريخية بييجي العهد اللي بعده ويحاول يشوهه عشان يبان ان هو احسن منه"، وهو ما حدث تماما مع الملك فاروق واعتقد انه لم يكن الأول ولن يكون الأخير.
ليست هناك تعليقات:
إرسال تعليق