12-12-2007 الساعة 1 صباحا
وانتهت أول ساعة في أول يوم من سنة جديدة من عمري، امبارح كان يوم ميلادي ومش هقول طبعا عيد ميلادي ...امبارح خلصت سنة من عمري كانت وبلا منازع اسوأ سنة مريت بيها من كل النواحي سواء عدم توفيق في الحياة العملية أو الدراسية أو حتى الشخصية؛ يمكن أبرز شئ واللي هتخليها سنة متتنسيش من حياتي هي فقدان واحد من أعز الناس في حياتي واللي لا يمكن أي شئ أو أي إنسان أيا كان أنه يعوضه؛ الإنسان اللي اتعلمت منه كتير وهو موجود ولسة باتعلم منه أكتر بعد رحيله وكل يوم بيثبتلي صحة كلامه ووجهة نظره اللي ساعات كنت باختلف معاها، صدقني أنت غيرت حياتي وغيرت شخصيتي وغيرت نظرتي للحياة وللناس ولحاجات كتير حواليا بغيابك.
طبعا الشئ المفروغ منه أن الأقنعة زادت أويييي في حياتنا وأن كتير منها تساقط السنة دي يمكن منها ناس مكنتش اتخيل عمري انهم يكونوا كدة بس للأسف هيا دي الحقيقة اللي لازم اعترف بيها واللي اتعودت عليها...شكرا يا صديقة عمري اللي عرفتها لأكثر من 10 سنين واللي تعرف عني أكتر ما اعرف عن نفسي
اتعرفت على ناس جديدة دخلوا حياتي بلا مقدمات وأضافوا ليا ولشخصيتي بس للأسف فقدتهم برضو (مش باقولكوا سنة تحفة) أنا مش زعلانة منكوا بس باعتب عليكوا انتوا الاتنين على الإختفاء الغامض دة وعلى الأقل كان من حقي كلمة مع السلامة أو إلى اللقاء أو حتى الوداع، ولو إني مسمعتش منكوا الكلام دة بس باقولكوا أنا اتشرفت بمعرفتي بيكوا واشكركوا على وقفتكوا جنبي في الأيام الصعبة اللي مريت بيها، ربنا يوفقكوا في حياتكوا ويارب اسمع عنكوا أحسن وأجمل الأخبار دايما
يمكن الحاجة الوحيدة الكويسة اللي حصلتلي هيا ان في ناس كانت فكرتي عنهم مختلفة عن حقيقتهم اللي اكتشفتها وفرحت جدا بيها...يا رب نفضل كويسين دايما مع بعض ونقف جمب بعض دايما، واني كمان بدأت افهم الحياة والناس حواليا أوييي يمكن هيا تبان انها سنة بس هيا سنين بالنسبة لي من اللي اتعلمته ولو أن في النهاية هيفضل الإنسان أخر شئ ممكن فهمه وهتفضل برضو الأقنعة موجودة وبتكتر كمان
أنا فرحانة أوي ان السنة دي خلصت من عمري ويا رب متكررش وتكون السنة الجاية أحسن وأقدر احقق فيها اللي باتمناه...ادعوووولي.
ليست هناك تعليقات:
إرسال تعليق