المفروض إن السنة دي والسنة الجاية تحتفل جامعة القاهرة بمئويتها يعني مرور 100 سنة على إنشائها، والشئ العادي والطبيعي والمتوقع إن تكون فيه إحتفالات كبيرة جدا بهذه المناسبة وتلقي الضوء على واحدة من أكبر وأعرق الجامعات في الشرق الأوسط بل وفي العالم كله، لكن المفاجأة إن محصلش أي حاجة وجت المئوية ومحدش حس ولا عرف واللي عرف عرف بالصدفة وسط تعتيم وعدم إهتمام إعلامي بهذه المناسبة.الغريب بقا فعلا ان تصادف إحتفال النادي الأهلي هو كمان السنة دي بمئويته؛ شوفو الفرق بقا إهتمام إعلامي غير مسبوق وحشد جماهيري رهيب وإحتفالات والدنيا قامت ومقعدتش، مع كااامل إحترامي للنادي الأهلي وجماهيره بس دي قلعة من قلاع العلم ومنارة بتنشر العلم وتنير العقول وخرجت المئات بل الآلاف من الشخصيات العظيمة والمعروفة في كافة الميادين سواء السياسية أو الإقتصادية أو العلمية أو الفنية أو الأدبية باذكر منهم على سبيل المثال طبعا لا الحصر:
ثلاثة من العرب الحائزين على جائزة نوبل وهم: الأديب "نجيب محفوظ" خريج كلية الآداب جامعة القاهرة والرئيس الفلسطيني الراحل "ياسر عرفات" خريج هندسة القاهرة والدكتور" محمد البرادعي" خريج كلية الحقوق
وتخرج فيها أيضا كثير من رؤساء الوزراء ووزراء مصر منهم: "عزيز صدقي"،" د.عاطف عبيد"، "عبد العزيز حجازي"، "د.على لطفي"،" د.أحمد نظيف"،" د.بطرس غالي"، وأيضا وزيرة الدفاع اليابانية الجديدة السيدة "كوئيكية يوريكو" التي تخرجت من قسم الإجتماع بكلية الآداب جامعة القاهرة عام 1976
ومننساش طبعا أن جامعة القاهرة كانت أول جامعة تلتحق بها فتيات وكان منهم:" سهير القلماوي" أول فتاة جامعية، وعالمة الذرة الرائدة في هذا المجال"سميرة موسى"، والأديبة "عائشة عبد الرحمن" "بنت الشاطئ" وغيرهم الكثيرين
شوفتوا أد إيه هي جامعة عريقة وشوفتوا أد إيه إحنا بقينا في زمن لا يقدر قيمة العلم ويعلي قيمة أشياء تانية ملهاش نفس القيمة.
أنا بافتخر واتشرف أني واحدة من خريجينك وادين ليكي بالفضل في تشكيل جانب كبير جداا من شخصيتي واتعلمت فيكي حاجات كتيرة جدا مكانش ممكن اتعلمها في أي مكان واتعرفت فيكي على أشخاص مكنش ممكن برضو اتعرف عليهم في أي مكان سواء زملاء أو دكاترة أو شخصيات عامة، ومهما حصل وتجاهلوكي برضو هتفضلي إحدى أهم قلاع ومنارات العلم في العالم كله.
على فكرة: برنامج "البيت بيتك" اللي بيتذاع على القناة الثانية في التليفزيون المصري والقناة الفضائية المصرية في مبادرة منه لتكريم جامعة القاهرة هيذيع حلقة خاصة على الهواء مباشرة يوم السبت الجاي 15-12 من قاعة الإحتفالات بجامعة القاهرة...متنسوووش تشوفوها
وبرضو يا عيني عليكي يا جامعة القاهرة
ليست هناك تعليقات:
إرسال تعليق